ابنِ صفی ۔ تخلیقی مرج البحرین

۶ ۔ نئے مصنّفین نئی نگارشات

نئے ادیب ابن صفی مرحوم سے کیا سیکھ سکتے ہیں؟

جس طرح کا آپ مطالعہ کرتے ہیں اسی طرح لکھنا ایک خواہش بن جاتی ہے ۔ مثال کے طور پر میں نے جب بھی کہانی لکھنے کا سوچا ابن صفی ایک آئیڈیل کے طور پر سامنے آن کھڑے ہوتے۔ہر چاہنے والے کے سامنے کوئی بت موجود ہوتا ہے۔ بے شک وہ کعبہ کی جانب منہ کیے رکھے۔

 لیکن خیر۔۔۔میں بہت محتاط تھا مجھ پر کاپی یا ٹھپہ ساز جیسا الزام نہ آئے۔ حتی الامکان ان سے ہٹ کر لکھنے کی کوشش کرتا ہوں۔ چناچہ میرے ناولوں میں ابن صفی مرحوم کی چھاپ نہیں ملے گی لیکن ان کی طبیعت ضرور ملے گی۔

چھاپ جیسے الزامات سے بچنے کے لیے میں نے لکھنے سے پہلے فیصلہ کر لیا تھا روایتی جاسوسی ناول لکھنے ہی نہیں چناچہ میں نے ایک بالکل نئی اور الگ جہت تلاش کی۔

جاسوسی ناولوں کے عمومی موضوعات کے علاوہ چھوٹے موٹے جرائم اور معاشرتی سماجی مسائل اہم ہونے کے باوجود کسی دلچسپ قالب میں ڈھالنا بہت مشکل کام ہے۔ ان پر جاسوسی ,رومانوی یا سماج سدھار قسم کے ناول لکھنے والوں کی خدمت میں اکیس توپوں کی سلامی اور ساتھ ایک سنہری شام عالیہ اور عظمی کے ساتھ۔ بس اسی پر گزارا کریں۔

تخلیقی ناول وہ ہے جو اپنی طرف کھینچے جس میں کشش ہو جو  روح کو متوجہ کرے۔ محض لفاظی اور زبان دانی سے یہ ممکن نہیں۔

میرے خیال سے سماجی رومانوی معاملات مرکزی خیال بنائے بغیر بھی ہلکے پھلکے انداز میں تذکرے میں آ جاتے ہیں جیسا کہ ابن صفی مرحوم نے یہی انداز اپنایا تھا۔

میں کچھ نیا لکھنا چاہتا تھا۔میں نے اپنی تحریروں کا جائزہ لیا اور خود سے سوال کیا۔ کون سی چیز میں ہمیشہ پڑھنا پسند کرتا رہا ہوں۔ جواب ملا۔ سائنس فکشن اور ورلڈ مسٹریز۔ یوں طے پا گیا کیا لکھنا ہے۔ دنیا کے سربستہ رازوں پر تھرلر ناول سیریز!

مشابہت ختم کرنے کے لیےمیں نے انسپکٹر,کرنل, کیپٹن,سارجنٹ, ایجنٹ وغیرہ جیسے کرداروں کو منتخب نہیں کیا۔بھئی اب ان عہدوں کا پیچھا چھوڑ دیں۔ وہ زمانہ اور تھا جب ان عہدوں اور وردی کی کچھ عزت تھی اب بھلا کون برداشت کرتا ہے ایسے نمونے۔

میرے کردار فلاسفر, سائنسدان, آرکیالوجسٹ ہیں یا پھر سرکس کے فنکار ہیں۔ یہ پس منظر لے کر لکھنا ایسا آسان نہیں کہ لکھ لکھ کر ڈھیر لگائے جا سکیں۔ ایک ناول تین چار مہینے میں مکمل ہو پاتا ہے۔  جان گسل کام ہے ۔مسلسل تحقیق اور محنت کے بغیر ممکن نہیں۔

 محض تھرلر جاسوسی ناول اور اس میں تفریحی ,مزاحیہ واقعات پیش کرنے ہوں تو وہ میرےلیے بہت آسان ہے۔ اس پر تو مجھے اتنا وقت بھی نہیں لگے گا جتنا یہ مضمون تحریر کرتے ہوئے لگا۔  شاید ریلیکس ہونے کے لیے بیچ میں کبھی اس طرح کے ناول لکھوں جن کا مقصد محض تفریح ہو۔

لیکن نیا سوچیں نیا۔۔۔ میرے لیے تصوف ,روحانیت ,سائنس فکشن کو یکجا کرنا ایک نہایت دلچسپ اور بالکل نیا تجربہ ہے۔

لیکن یہ بات یاد رکھیں خواہ آپ کچھ بھی لکھنا چاہتے ہیں ابن صفی مرحوم کی کتابوں کا کورس لازم ہے۔ میرے بس میں ہوتا تو سکول کی ساتویں آٹھویں کلاس میں عمران سیریز اور جاسوسی دنیا کے پچاس پچاس ناولوں کو نصاب میں شامل کر دیتا۔

ابھی وہ اگرچہ نصاب کا حصہ نہیں ہیں لیکن ابن صفی اور اشتیاق احمد کو میں پھر بھی نصاب کا حصہ تصور کرتا ہوں۔ میرے بچے نہیں ہیں اگر ہوئے تو ان کی تعلیم کا یہ دو مصنفین لازمی حصہ ہوں گے۔

ناول نگاروں کے لیے بہترین استاد ابن صفی مرحوم ہیں اگرچہ سیکھتا تو انسان سبھی سے ہے لیکن میں نے جب پہلا ناول لکھا تو باوجود پوری کوشش کئی مقامات پر ابنِ صفیت واضح دکھائی دیتی ہے۔

ذرا توجہ سے اس بات کو پڑھیں میری پوری کوشش مختلف نظر آنے کی ہوتی ہے۔مشابہ نظر آنے کی نہیں ؎

میں تیرا تو میرا مگر اس کے باوصف
تشخص میں اپنا جدا چاہتا ہوں
(حضرت باغ حسین کمالؒ)

اپنے آپ کو سب سے الگ منفرد ثابت کریں۔ بہت سے مصنفین نئے کردار تخلیق تو کر رہے ہیں لیکن واضح طور پر وہ پہلے سے مشہور کرداروں کی کاپی دکھائی دیتے ہیں۔بلیک اینڈ وائٹ بے رنگ و روپ کاپی۔

فنا فی اللہ تصوف کا ایک اونچا مرتبہ ضرور ہے لیکن  سنگِ میل ہے منزل نہیں۔ فنا فی اللہ کے بعد باقی بااللہ کا درجہ ہے۔ سادہ لفظوں میں اپنی خواہشات سے دستبردار ہو کر اللہ کی مرضی فنا فی اللہ ہے اور پھر واپس اپنی شخصیت کو نئے سرے سے یکجا کر کے ایک نئے انسان کی مانند اللہ کی مرضی کے ماتحت جینا اور اپنے نفس کی مداخلت سے محفوظ ہو جانا۔ باقی بااللہ ہے۔

لیکن فنا فی اللہ کا مطلب تباہی ہر گز نہیں ہے جیسا کہ ایک عوامی خیال پایا جاتا ہے جیسے یہ کوئی دھماکہ خیز وقوعہ ہے جس میں انسان کے پرزے اڑ جاتے ہیں۔

 البتہ یہ بھی درست ہے کہ دنیاوی عشق ,چاہت ,محبت میں نتائج کچھ اس سے ملتے جلتے ہی نکلتے ہیں چناچہ فنا فی الاسرار ناروی اپنی شخصیت بھی کھو بیٹھے اور نئی شخصیت کی تعمیر بھی نہ کر پائے مرزا صادق شرر نے کہا تھا ؎

گئے دونوں جہان کے کام سے ہم،نہ اِدھر کے رہے نہ اُدھر کے رہے
نہ خدا ہی ملا نہ وصالِ صَنم، نہ اِدھر کے رہے نہ اُدھر کے رہے

اپنے پسندیدہ ادیب کے بہترین نظریات کو ضرور اپنائیں زندگی کا حصہ بنا لیں لیکن ان جیسا بننے کا نہ سوچیں۔ اللہ تعالی نے ہر ایک کو اپنا نصیب دیا ہے اس پر قانع رہیں۔

جب لکھیں تو یوں لکھیں زندگی کی آخری کہانی لکھ رہے ہیں اسے پرفیکٹ بنائیں۔ لکھتے وقت اگر خود سسپنس دلچسپی اور ہیجانی کیفیت محسوس نہیں ہو رہی تو سمجھ لیں پھسپھسی کہانی ہے۔اگر خود کو بے اختیار ہنسی نہیں آئی تو کسی اور کو کیسے آئے گی؟

 عالیہ اور عظمی دونوں کی کہانی اسی وجہ سے پھسپھسی ہے کیوں کہ ادیبِ اعلی الفاظ و بیاں کے کمالات دکھانے میں مصروف رہتا ہے اس کے پاس نئی بات کوئی نہیں ہوتی۔وہ گھسی پٹی باتیں گھماتا پھراتا رہتا ہے۔

 ایسے کرتب باز قدیم زمانے سے پائے جاتے ہیں۔ ان کی تحریر سے لطف اندوز ہونے کے لیے قاری کو خواہ مخواہ پہلے خود کو باور کرانا پڑتا ہے کہ وہ ادبِ عالیہ پڑھ رہا ہے۔ جیسے ایک بہت بڑے مزاح نگار جن کے قارئین سمجھتے ہیں کہ انہی کا زمانہ چل رہا ہے درحقیقت ان کی تحریر پڑھ کر خود کو گدگدی الگ سے کرنی پڑتی ہے تاکہ ہنسی آئے۔

ابن صفی ایک پوری سچویشن بنا کر لاتے تھے جس کے بعد چھوٹی چھوٹی ایسی باتیں بھی ہنسا دیتی تھیں جو درحقیقت کوئی لطیفہ نہیں ہوتی تھیں۔لیکن یہ کرداروں اور ابن صفی مرحوم کی طبیعت کی تاثیر تھی جو سارے بدن میں مسکراہٹ بن کر گدگداتی چلی جاتی تھی۔ یہی میرے نزدیک حقیقی ادبِ عالیہ و عظمٰی ہے۔

جب آپ لکھیں تو کہانی اس قابل ہو دنیا کے سامنے فخریہ پیش کر سکیں۔ جسے بار بار پڑھا جا سکے۔ میرے صرف چار ناول ہیں لیکن مجھے ان کی ٹینشن کوئی نہیں۔ وہ کہیں سے مار کھا کر نہیں آنے والے۔۔۔۔الحمد للہ۔۔۔۔ جہاں لے جائیں جس ایڈونچر رائٹر سے چاہیں تقابل کر لیں۔ یہ میری خوش فہمی ہو سکتی ہے مگر ٹینشن پھر بھی نہیں۔ کیوں کہ ابھی تو ابتدا ہے۔۔۔ابتدا میں تو ویسے ہی کافی گنجائش ہوتی ہے۔

میرے ہاں پاکیشیا نام کا کوئی ملک نہیں ملے گا۔ اسی حقیقی دنیا کی حقیقی لوکیشن کے ساتھ حالاتِ حاضرہ کو ساتھ لے کر چلتی ہوئی کہانیاں ہیں۔ یہ عالیہ یا عظمٰی سے کوئی رشتہ جوڑ پاتی ہے یا نہیں لیکن سپنا سے ان کا تعلق بہت گہرا ہے۔ یہ تفریحی ادب کے ساتھ تحقیق اور علمی شعبہ جات سے جڑی ہیں اس لیے پڑھنے والے کا وقت ضائع نہیں ہوتا۔لیکن سُفنا(سپنا) میری بنیادی محبت ہے۔

پرائے کردار پر کبھی مت لکھیں۔ ناول شائد چل جائے لیکن آپ کا اپنا چلنا ہمیشہ کے لیے مشکوک ہو جائے گا۔

میں نے بچپن میں بچوں کے لیے ایک ناول ٹارزن پر لکھا تھا۔ اگر چھپوا دیتا تو ٹارزن پر لکھا گیا بہترین ناول ثابت ہوتا لیکن میں نے اسے آگ میں ڈال دیا۔ اس لیے کہ ٹارزن میرا کردار نہیں تھا۔ دوسروں کے کرداروں پر لکھا بالآخر راکھ کا ڈھیر ثابت ہوتا ہے۔

 آنے والے وقت میں کوئی اسے سنجیدگی سے نہیں لے گا۔ ایک مصنف کا نقطہ کمال لکھ لکھ کر ردی کے ڈھیر لگانا نہیں بلکہ کچھ ایسا جو امر ہو جائے۔ جو ناقابلِ فراموش ہو۔ خواہ ایک ہی ناول ہو لیکن ایسا ہو کہ ہزاروں کی مت مار دے۔

ایک طویل عرصہ لکھ لکھ کر جلاتا رہا ہوں۔ بالآخر 52 سال کی عمر میں پہلا ناول ممنوعہ علاقہ لکھا جس پر دل کچھ مطمئن ہوا اور پبلشنگ کے لیے بھیج دیا۔

منیر نیازی مرحوم کے اشعار ہیں کہ ؎

کج شوق سی یار فقیری دا
کج عشق نے در در رول دِتا
کج شہر دے لوک وی ظالم سن
کج سانوں مرن دا شوق وی سی

اعلی کی تلاش گم کر دیتی ہے۔میں نے خود ہی ساری زندگی پرفیکشن کے چکر میں نگارشات اور وقت ضائع کر دیا اور لوگ تو ویسے ہی نہیں چاہتے کوئی آگے بڑھے۔لیکن ردی کا ڈھیر لگانے سے بہرحال یہ بہتر ہے۔ پنجابی میں کہتے ہیں کوجے رونا نالوں چُپ چنگی۔

یہاں بتانا ضروری ہے کہ جس عمر میں گمنام اسراراحمد نے پہلا ناول لکھا اسی عمر میں برصغیر کے سب سے نامور ادیب جناب ابن صفی اسراراحمد اڑھائی سو شاہکار ناول لکھ کر دنیا سے رخصت ہو گئے تھے ۔

ہمیشہ افسوس رہے گا ان کی اتنی جلد رخصتی کا ۔۔۔ آہ ۔۔۔

نیا لکھنا محنت طلب ہے لیکن کوئی انگلی نہیں اٹھا سکتا۔ میرے ہاں طبع زاد نام کی کسی چیز کی بھی گنجائش نہیں۔ بالکل خالص نئی تخلیق۔۔۔

 ایک آخری بات جاسوسی ناولوں کے حوالے سے دوبارہ کہنا ضروری سمجھتا ہوں ۔ پہلے سے مشہور کرداروں پر کبھی مت لکھیں۔ محنت آپ کی اپنی ہو گی اور چربہ کسی اور کا کہلائیں گے۔ جو اس بات کو سمجھ لیں گے وہ کچھ نیا لکھ سکیں گے۔

اسراراحمدادراک
راولپنڈی ۔ یکم جولائی 2024